邊間廉航全綫開放機艙 Free Wi-Fi？！

2017.01.19

我知，只要有錢，係機艙上網又算得係乜？問題係作為窮 L 既不會「科水」購買天價 data、亦唔會有機會坐某啲航空公司嘅 business class 可以免費上網，所以有廉航全綫 free wifi -- 冇錯，係全綫 free！free！free！（太重要講三次）-- 對於機不離手嘅人嚟講，絕對係好消息！

今次咁皇恩浩蕩推出機上 free wifi 嘅係美國廉航 JetBlue。喺大眾心目中，Jetblue 係比其他廉航「高級」少少嘅，而早於 2013 年 JB 已經推出 wifi 服務，不過當時只得一架機有咁大把，最近佢哋就喺所有航班安裝咗「Fly-Fi」呢個硬體，乘客搭 JB 任何一班機，就可以一毫子都唔使畀就可享有上網服務，完全打破平嘢冇好呢個概念！

免費上網都不突止，呢個 free wifi 仲要係「無中斷」，即係無論起飛或降落時，用家都可以唔使熄機、唔使 plane mode，繼續上網煲劇覆 message，係咪正先？雖然上網速度冇平日的光纖咁快，但 JB 都有 15 - 30Mbps，至少唔算龜速啦，而據知佢哋希望 2018 年可以再升級至 100 Mbps。無錯，有人一定會覺得只係得美國內陸廉航有呢項服務關唔到佢事，但認真一諗，今次有廉航帶頭，慢慢就一定會有其他公司加入吸客，大家遲早咪有得益囉，Yeah~

JB 三款型號飛機 A320、A321 及 E190 已經 100% 全面覆蓋 Fly-Fi，即係表示無論你坐乜位都可以上網，太開心！

圖：JetBlue、網上圖片

編按：其實空中上網服務早於 2008 年開始，由最早期只可 check email，到目前大部分航空公司仲收緊錢（如段時間、mb 數或機程計算），有航空提供「全綫免費」，仲要係廉航，真心好大進步！感謝一眾網友提醒，廉航 Norwegian Air 其實同 Jetblue 及部分航空公司如土耳其、阿聯酋等差不多同期（2011 年左右）開始提供「局部」免費 wifi：限時、限機種或航班，都係「掩掩揚揚」唔得大方，似製造噱頭居多！目前 Norwegian Air 並冇保證全綫航班都有 free wifi，編輯部有人去年由 Gatwick 飛奧斯陸，係茅 wifi 嘅！check 番官網，寫明 free wifi「只限歐洲同美國/加勒比海航班」，乘客要喺起飛前兩小時上網自己 check 番班機有冇 free wifi。反觀 Jetblue 呢一著就大方得多喇；問題係，並非人人都有需要飛美國廉航，那些優惠原來不是屬於我的……希望亞洲呢邊嘅廉航盡快跟跟佢啦！