半夜三更出入羽田機場,好多日本旅遊精都試過啦?清晨到着羽田,最難熬之處,怕且係要等到中午時分先有得酒店 check in;又或者玩完一整日,準備晨早 6 點幾機返香港,漫漫長夜點消磨位於羽田機場附近的「天然溫泉平和島」,係唔少旅行精嘅權宜之計,距離機場 20 分鐘車程,又係東京都內少數嘅天然溫泉,上路途中短泊幾小時攤唞,聽落好似好理想!實試又掂唔掂?
CHECK POINT 1:高濃度炭酸泉氣泡美肌大法,大家聽過未?近年日本 OL 界勁流行用炭酸氣泡水沖涼或浸浴,據說有助毛孔擴張、能促進新陳代謝,美肌效果明顯!而平和島踲泉水來自地底二千米嘅鈉鹽化物泉源,每日出水量高達 150 噸,水質呈弱鹼性,呢個至 hit 嘅高濃度炭酸泉泉水,就充滿無限咁多個神奇泡泡,浸落去就會睇到小氣泡自皮膚浮現,但又唔會去到「拮肉」咁誇張。總之有得浸就梗係狂浸啦,男女湯都有!CHECK POINT 2:座湯
另一個溫泉含鈉量較高,泉水呈土紅色,由座湯開始湧出,坐上去感到背部好溫暖。CHECK POINT 3:岩盤浴
岩盤浴設於濕蒸房入面,四款岩石座位於攝氏 50 度蒸氣中會釋放不同礦物質,據說可達到不同療效。
用家實試:值得一去再去!
「係日本典型溫泉設施的布局,環境算新淨,而且地點無敵,極近機場,夜機或極早機人士可舒服上路。不過我會勸大家早啲到,一來接駁車好早就冇,二來隔離有好大間驚安之殿堂,仲大過東新宿嗰間,因住買到唔捨得走!」Facebook 專頁│「敗家樂」版主 阿樂
阿樂點評:「留意番大浴場浸池和 Viewing Spa,每日分別於 2:30-6:30am 和 6:30-9:30am 會進行清潔!」
化粧間有風筒、直髮器,化粧水、乳液和護髮噴霧無料使用,好貼心。
公共休憩位任君攤唞。唯一缺點係深夜黃金時段免費 Wifi 經常斷綫,同埋人多難免有人扯鼻寒,呢點真係冇計!
阿樂點評:「尾班車於 10:20pm 由 JR 大森站開出,我上次追唔切車,拖住喼要行成 20 分鐘先到,其實係有啲辛苦!」
瞓唔着可於圖書閣任睇日文書刊漫畫。
阿樂點評:「周末晚上都算多人,休眠室爆滿,好彩有沙發位。另顧客以當地人為主,我全程都聽唔到廣東話或普通話。」
和洋食堂水準高
浸完溫泉歎番杯、享受一頓精美料理,完全為短泊大加分!平和島最被忽視的一部分可能係餐廳,空間寬敞,有分吸煙及非吸煙位置,水準相當不俗,米飯起用富山縣產越光米、味噌湯內付羽田河岸沖蜆,用料認真;除了例牌嘅日式定食、佐酒料理,仲有國產和牛漢堡扒和甜味噌牛肉絲包子定食,三大和風口味均值得推介!(左)海鮮天婦羅定食,炸物漿薄料足,吞拿魚刺身新鮮,1,880 日圓(約 122 港元),仲有冬季限定「鰭酒」,暖笠笠燗酒加入一片河豚鰭乾,散發淡淡魚香,700 日圓(約 46 港元)。(右)和牛漢堡扒鐵板定食,上枱前仲有火焰特效,卻又毋損和牛肉質的嫩滑,推介!1,580 日圓(約 103 港元)。
旅客提案:$231 包車宿一宵 為羽田旅客而設兩個 package,「Welcome Course」應對深夜到着的旅客,提供 4 班接載巴士由羽田直達平和島,包早餐,並可逗留至翌日 2pm;「Flight Course」則沒有餐點提供,但可讓客人於 6pm 進場,由 10pm 起共有 6 班深宵巴士直達羽田國際綫。價錢 3,500 日圓(約 231 港元),接送巴士須於網上預約,深夜飛行嘅朋友可以留意番! | |
Welcome 方案 | Flight 方案 |
羽田出發 | 平和島出發 |
11:40pm | 10pm |
12:40am | 11pm |
1:50am | 4am |
5:40am | 4:50am |
6am | |
7:10am |
天然溫泉平和島
地址:東京都大田區平和島 1-1-1 BIG FUN 平和島 2 階
電話:+81 (0) 3 3768 9121
網址:www.heiwajima-onsen.jp
預訂網址:heiwajima-onsen.resv.jp
收費:平日、周末成人 1,800 / 2,100 日圓,最長逗留 7 小時;12am 後使用,加收 1,300 日圓
交通:東京鐵路京急綫平和島站轉乘「One Coin」巴士,車程 3 分鐘,車費 100 日圓(7:50am - 10:20pm),另有「boat race」専用免費巴士(9:35am - 3:30pm);另可於 JR 大森站東口轉乘「One Coin」巴士或「boat race」専用免費巴士,車程 10 分鐘
↓ 請您免費飛轉日/韓/泰!↓
↓立即睇打卡熱點/地道隱世美食/必買手信等!↓