自從新冠疫情過去,好多香港人都報復式外遊,咁耐無飛,世界咁大,去邊度好呢?嗱,英國市場研究機構歐睿國際(Euromonitor International)就啱啱發表咗最新嘅「全球百大旅遊目的地城市」報告,頭20名入面,原來有多達12個歐洲城市,睇嚟要睇定歐洲幾時有平機票喇!咁香港人最愛嘅東京、大阪、首爾同台北,又排第幾呢?
英國市場研究機構歐睿國際(Euromonitor International)周一(11日)發表最新「全球百大旅遊目的地城市」報告,報告比較咗100個城市55個不同指標,涵蓋經濟及商業表現、旅遊表現、旅遊基礎設施、旅遊政策和吸引力、健康和安全,以及可持續性等,再得出城市得分和排名,結果法國首都巴黎連續第3年成為第一。
法國首都巴黎連續第3年成為「全球百大旅遊目的地城市」報告中嘅第一位。
歐洲城市在報告中表現出色,有多達12個城市進入前20位,而亞太地區有5個城市,北美有2個城市,中東和非洲各有1個城市。勇奪榜首嘅巴黎,今年預計接待超過1,500萬名國際遊客,明年可望透過舉行奧運吸引更多遊客。報告認為全球旅遊業今年迎來復甦,重要原因係中國取消咗出入境檢疫限制,使中國出境遊客數量回升。
首20位入面有多達12個歐洲城市,報告指明年巴黎搞奧運,應該可以吸引更多遊客。
日圓疲弱令東京首次躋身十強
而香港人最愛嘅日本東京,原來係首次進入前十名排第4,報告指出要歸功於旅遊基礎設施的改善、Covid-19相關法規嘅鬆綁及日圓的疲弱,等同為國際旅客提供咗物超所值嘅服務。在2019年新冠疫情前,曾經連續9年位列榜首嘅香港,就由去年嘅第36位,回升至第17位。報告預計今年訪港遊客量達1,470萬人次,增幅高達2,495%。而台北則係唯一上榜嘅台灣城市,排名第28名,相較去年嘅48名進步咗20名。
香港人最愛嘅日本東京,原來令年係首次進入前十名,排第4。
同樣係好受香港人歡迎嘅首爾,今年排第14。
全球百大旅遊目的地城市首20位排名
排名 | 城市 |
1 | 法國巴黎 |
2 | 阿聯酋杜拜 |
3 | 西班牙馬德里 |
4 | 日本東京 |
5 | 荷蘭阿姆斯特丹 |
6 | 德國柏林 |
7 | 意大利羅馬 |
8 | 美國紐約 |
9 | 西班牙巴塞隆拿 |
10 | 英國倫敦 |
11 | 新加坡 |
12 | 德國慕尼黑 |
13 | 意大利米蘭 |
14 | 南韓首爾 |
15 | 愛爾蘭都柏林 |
16 | 日本大阪 |
17 | 中國香港 |
18 | 奧地利維也納 |
19 | 美國洛杉磯 |
20 | 葡萄牙里斯本 |
text/Joyce
photo/HKET圖片庫
↓ 請您免費飛轉日/韓/泰!↓
↓ 大灣區一小時生活圈!最新打卡熱點/熱門美食等!↓