想出門外遊玩得開心又放心計劃離港外遊前必睇<解答5個旅遊業賠償基金注意事項>

文: PM

2022.12.19

隨著入境檢疫措施逐步放寬，相信大家都睇咗唔少旅遊熱門地嘅資訊，準備喺聖誕節或農曆新年期間外遊鬆一鬆。無論選擇去邊都好，外遊旅行要玩得開心又放心，當然要確保自己嘅旅程受到全面保障。除咗買旅遊保險，其中一樣可以保障到大家嘅外遊旅程就係旅遊業賠償基金（賠償基金）喇！

原來，賠償基金宜家係由旅遊業監管局（旅監局）管理嘅。旅監局係喺2020年1月成立嘅法定監管機構，負責有關旅行代理商、導遊同領隊嘅發牌同規管工作，亦會透過為旅遊業界舉辦唔同嘅講座同培訓課程，致力提升業界嘅專業水平，確保消費者嘅安全同權益受到保障。

隨住旅遊業新規管制度喺2022年9月1日全面實施咗之後，旅監局分別喺旅行代理商註冊處同香港旅遊業議會接管咗有關旅行代理商、導遊同領隊嘅發牌同埋規管事務，仲負責管理埋為出發外遊嘅大家提供保障嘅賠償基金。大家記住一定要持有已蓋上電子徵費印花嘅外遊費收據先可以受到賠償基金嘅保障㗎！

唔知大家有無留意U Travel曾經有一篇報道〈想出門外遊玩得開心又盡興計劃離港外遊前必睇5個旅遊業賠償基金注意事項〉呢？相信大家睇完後，都會對賠償基金有一定嘅認識。今次我哋就同大家進一步了解賠償基金嘅重要一環——電子印花徵費，解答5大常見疑問！

1. 電子印花徵費係咩嚟？點樣查核電子印花徵費是否有效？

為咗令外遊旅客可以得到賠償基金嘅保障，根據《旅遊業條例》（第634章）第146條，持牌旅行代理商負有法律責任，需要就每筆已向外遊旅客收取咗嘅外遊費，向旅遊業監管局繳付相等於外遊費全數0.15%嘅印花徵費。喺持牌旅行代理商繳付印花徵費後，旅行代理商所發出嘅收據上就會見到印咗一個清晰顯示徵收金額同日期嘅電子徵費印花。

例如，如果你俾咗旅行代理商$12,000港元購買香港至上海機票連當地酒店住宿套票，張收據上嘅電子徵費印花就應該顯示已繳交$18港元嘅印花徵費，就好似下面嘅圖樣咁。如果大家俾咗外遊費後發現收據上無電子徵費印花、電子印花模糊不清、印花徵費額不足（少於已付外遊費全數嘅0.15%）或者收據和印花上所載的旅行代理商名稱和牌照號碼跟所光顧嘅旅行代理商不符，就要記得提你地幫襯嘅旅行代理商糾正返呀！

至於大家如果想查核收據上嘅電子印花徵費係咪有效，除咗可以透過旅遊業監管局電子印花徵費系統嘅網頁（https://elevy.tia.org.hk/），亦都可以用智能電話或平板電腦掃描電子印花上面嘅二維碼（QR Code）。

2. 購買什麽外遊服務先會喺收據上蓋上電子印花徵費？

根據《旅遊業條例》（第634章），外遊旅客指已向持牌旅行代理商支付外遊費購買關乎同一次旅程的任何以下各段描述的兩個或多於兩個服務及安排的外遊服務組合：

(a) 關涉在旅程中以任何交通工具提供的載運的服務，該旅程在香港境內開始，而其後主要在香港境外進行；

(b) 關涉在香港境外的住宿的服務；

(i) 並非附屬於(a)或(b)段所述的服務；

(ii) 在香港境外進行；及

(iii)（如該服務組合包括該活動）構成該服務組合的主要部分。

持牌旅行代理商需要向外遊旅客發出蓋上電子徵費印花嘅收據。

根據以上嘅定義，旅客如果向持牌旅行代理商購買以下任何一類嘅旅遊服務，相關收據就唔會蓋上電子徵費印花：

單獨購買機票、船票、巴士票的交易；
單獨購買酒店住宿的交易；
購買並沒有指明將用於兌換全部或任何兩項外遊服務組合的預付式旅遊禮券或旅遊現金券的交易。

3. 持有已蓋上電子徵費印花收據嘅外遊旅客，可以獲得賠償基金什麼保障？

如持有已蓋上電子徵費印花嘅收據，外遊旅客可以獲得賠償基金兩類嘅保障：

損失外遊費嘅保障：喺外遊旅客購買外遊服務後持牌旅行代理商倒閉嘅情況下，賠償基金可以為受影響旅客提供所損失外遊費90%嘅特惠賠償（按照簡化程序提出的申請所涉的最高款額為$15,000港元）。
喺外遊活動中遇上意外傷亡嘅保障：如果萬一唔好彩，外遊旅客喺持牌旅行代理商提供或舉辦嘅外遊活動中意外傷亡，係可以得到總數達$300,000港元嘅特惠賠償以報銷當地醫療、殮葬/遺體（包括骨灰）運返香港，以及親屬因旅客傷亡而往訪當地所招致嘅實際開支。